„თქვენ რა ხალხი ხართ, დონ?! სასწრაფოდ მოუხსენით, დონ! სწრაფად, დონ!“, – ამბობს ჩეჩნეთის ლიდერი, რამზან კადიროვი საკუთარ „ტელეგრამ“ არხზე გამოქვეყნებულ ვიდეოში და დედამისისთვის დასავლეთის მიერ დაწესებული სანქციების მოხსნას ითხოვს.
„პირველი და მეორე ჩეჩნური კამპანია, საქართველო, უკრაინა – ეს ყველაფერი აშშ-ის პროექტებია პოსტსაბჭოთა სივრცეში, რომ აღარაფერი ვთქვათ სხვა კონფლიქტებზე, რომლებიც მთელ მსოფლიოში, გამოგონილ შემთხვევაზეა გაჩაღებული, მაგრამ ეს რუსეთთან არ იმუშავებს. დაე, გაერთონ ჩვენთვის თავიანთი უმტკივნეულო სანქციების დაწესებით“, – წერს კადიროვი ვიდეოს ქვეშ.
ჩეჩნეთის პრორუსი ლიდერი ვიდეომიმართვაში თავად ემუქრება დასავლეთს სანქციების დაწესებით.
„ევროპის, რუსეთის ტერიტორიაზე ამერიკელი დიპლომატები ვერ იმოგზაურებენ… ჩვენც დავაწესებთ სანქციებს და მათ დავაკავებთ. ასე, რომ არ ვხუმრობ, ყელში ამოხვედით…“, – ამბობს კადიროვი და აღნიშნავს, რომ დასავლეთის ამ ქმედებას „უპასუხოდ არ დატოვებს“.
ცნობისთვის, აშშ-მა რამზან კადიროვის დედის, აიმან კადიროვას წინააღმდეგ სანქციები 24 აგვისტოს დააწესა. სანქციები, ასევე, ჩეჩნეთის სამ თანამდებობის პირს შეეხო.
კომენტარები