ომის კადრების გავრცელების გამო ჟურნალისტ ალექსანდრე ნევზოროვის წინააღმდეგ სისხლის სამართლის საქმე აღძრეს

უფრო კონკრეტულად კი საქმე ეხება ჟურნალისტის მხრიდან ქალაქ მარიუპოლის სამშობიარო სახლის დაბომბვის კადრების გავრცელებას.

გამომძიებლების თქმით, 9 მარტს ნევზოროვმა Instagram-ის საკუთარ გვერდზე და YouTube არხზე გამოაქვეყნა „განზრახ ცრუ ინფორმაცია სამშობიარო საავადმყოფოს განზრახ დაბომბვის შესახებ რუსეთის შეიარაღებული ძალების მიერ.“

„პუბლიკაციებს თან ახლდა დაბომბვის შედეგად დაზარალებული მშვიდობიანი მოსახლეობის არაზუსტი ფოტოები. ამ სურათების გავრცელების წყარო უკრაინული მედიაა“, – ნათქვამია საგამოძიებო კომიტეტის განცხადებაში.

გამომძიებლები ადგენენ ნევზოროვის ადგილსამყოფელს საგამოძიებო და საპროცესო მოქმედებების ჩასატარებლად.

შეგახსენებთ, ნევზოროვმა თბილისში „გავრილოვის ღამის“ შემდეგ  საქართველოს მხარდასაჭერად თავის YouTube არხზე ვიდეო გაავრცელა. ნევზოროვმა აჭარული განდაგანას ფონზე, მაისურზე Georgia დაწერა. 

ნევზოროვი რადიო „ეხო მოსკვის“ პოპულარული საავტორო გადაცემის წამყვანი იყო.